Mikitämäe kooli Helmine iistütlejä Hainsoo Minna sai võrokõisi “Uma laulu” võistlusõl Eesti Rahvaluulõ arhiivi eräavvuhinna kõgõ pareba vana rahvalaulu moodu perrä tett laulu “Kuulatsõ kulätamah” iist.

Mia’ tuu avvuhind sis oll tuu laulu iist?

Tennokiri om mul siih ja raamadu’. Mul käve’ naase’ ka’ üteh laulmah. Tenno nuilõ lätski meil parebihe. Ku om kuur ja killõ, sis tä kõlas õks parebihe. Mi saimi õgalõ kooriliikmõlõ kutsõ Uma Pidolõ – toolõ võrokiilsele laulupidolõ. Ja saimi ka Ingrid Rüütli eripreemia ümbrikuh viil – tuu läts mi koorilõ.

Lauilimi säitsmekeisi. Ollimi eelviimätse laulmah. Sääl oll katskümmend laulu vai nii – kiä’ laul linti, kiä’ viil kuis. Hüä miil, õt meil niigi läts. Tuu oll lihtsalt üts pruuvminõ – määntsel tasõmõl mi olõ võrokõisiga’.

Minkõst tuu laul kõnõlõs?

Päälkiri om «Kuulatsõ’ kul´atama». Ja tuu laulu tei ma ku koorivanõp Nurmeotsa Sulo tahtsõ hindäle vahtsõt laulu, tõõsõ’ laulu’ omma’ ar’ laulõt jo’. Ku ausalt kõnõlda’, sis ma mõista-ai’ tõõsõlõ laulu tetä’, laula õks umast elost ja niimuudu.

Lauluh om nii, õt ku tä oll viil nuur miis ja läts hällü pääle. Kuu oll hällü kottal ja kuis kuutütre’ kul´ativa’ ja kuis poiss läts näide tandso sisse ja nakas nuidõ Kuu latsiga kuramiirmä. Ja Kuu sai korgõh kur´as. Peräst poiss sai kurvas ja käve õga õdagu hällü pääl, a näe-es nuid tütrikka kul´atamah.

Sääne jutus oll.

Olõt mitu aastakka olnu’ Kuniga sõnõlinõ, kas tuu laulu tegeminõ sis käve ka’ niimuudu vai oll tõisildõ?

S´oo lauluga oll mul aigu. Mõtõh tull etkost ja sis naksi tegemä. Laulat vai proomit: vot tuu sõna kõlba-ai’ ja tõõnõ sõna lätt parebahe. Kunigriigih oll nii veid´o’ aigu tuu jaos ette nätt. Parhilla’ sai selges oppi’ ja nõnnu säet ja kaet. Proomit nii ja proomit naa. Tuu ao pääle tegeminõ om õks kümme kõrda rassõp.

Kuis tuu mõteh tull, sääntsele võistlusõlõ minnä’?

Latsõ’ kinge’ mullõ sanatooriumituusigu Verskahe. Käve sääl aolehti lugõmah. Sääl loigi’ ja mõtli ja sai lolli pääga’ ar’ saadõtus. Ja mul omma’ koorih väiga hüä’ naase’, kiä’ tulli muka’ üteh. Jäimi’ väiga rahul.

Ilvesele olõ-õi häbü kaota’ ka’, eurolaulu tegijäle. Ma tuu pääle sukugi mõtlõ-õs, õt lää sinnä’ võitma.

Pääavvuhind Ilvese Aapolõ

Võromaal peet umakeelitsidõ ja -tett laula võistlusõ võit Setomaal tiidä’ laulumiis ja kiräts´ura Ilvese Aapo lauluga’ «Pristan» ja «Lodi tuu ja lodi vii». Võidulaulu’ valõ 26 laulu siäst vällä žürii iihotsah rahvaluulõtiidläse Ingrid Rüütliga’.

Umakeelitsidõ laula võistlus «Uma laul» om tett edimätse võrokeelidse laulupeo «Uma Pido» ettevalmistusõ raamõh. «Uma Pido» om võrokeeline laulu- ja rahvapido, mia’ tulõ Võru liinah ja Kubija laululava pääl 31. maikuu pääval. (SM)