Verska kuulutaminõ kuts riiki tunnistama, et Eestin omma olõman põliskeele (0)

Mahlakuu 18. pääväl võtsõ Eesti põlitsidõ kiili kuuntüükogo vasta Verska kuulutamisõ, minka kutsutas üles Eesti riiki tunnistama, et Eestin omma olõman põliskeele ÜRO üleilmalidsõ põliskiili aastagakümne 2022–2032 tähendüsen. Päält taa soovitasõ kuuntüükogo liikmõ alosta riigi tegemiisiplaani kokkopandmist põliskiili aastagakümne elloviimises Eestin ni põliskiili mõistõ keelesäädüsen paika panda.

Verska kuulutaminõ
Verska kuulutamisõ kõgõ päämäne sõnnom om, et üleilmalinõ põliskiili aastagakümme pututas õkva ka Eestit: mii ku Eesti põliskiili – võro, seto, mulgi, kihnu keele ja Kuusalu rannakeele – kogokundõ iistkõnõlõja kuuluda, et ka Eestin omma olõman põliskeele üleilmalidsõ põliskiili aastagakümne tähendüsen. Nii pututas jo pääle naanu üleilmalinõ põliskiili aastagakümme õkva ka mii kogokundõ ja Eesti riiki.”

Kuulutamisõ perrä om päälenaanu põlitsidõ kiili aastagakümme ”võimalus viil inämb ja parõmbahe tukõ Eesti põliskiili elojovvu alalõhoitmist ja vahtsõt virgutamist maailma põlisrahvidõ ja põliskiili kogokundõ kõgõ parõmbidõ tiidmiisi ja tegemiisi abiga.”

Püürdümisele ala kirotanuq ütisüse pidävä tähtsäs, et ”järgmädse kümne aastaga seen kasunu Eesti põliskiili kõnõlõjidõ arv, et mii kiili pruugitasi egä päiv nii koton, koolin, meediän ku asaajamisõn.”

Verska kuulutamisõga soovitõdas Eesti Vabariigil 2022. aastaga seen kokko pandaq riiklinõ tegemiisiplaan üleilmalidsõ põliskiili aastagakümne elloviimises üten põliskiili kogokundõga, ni keelesäädüste mano panda Eesti põliskiili mõistõ kuunkõlan rahvidõvaihõliidsi hüvvi praktikidõ ja Eesti põliskiili kogokundõ tarviduisiga.
Verska kuulutamisõ täüsteksti saa lukõ tast.

Eesti põliskiili kogokundõ tsõõriklaud Verskan
Mahlakuu 13. pääväl peeti Verskan Eesti põlitsidõ kiili kuuntüükogo tsõõriklaud, kon arotõdi Eesti põliskiili parhillast saiso ni plaaniti ütitsit tegemiisi jo päälenaanul üleilmalidsõl põliskiili aastagakümnel. Tsõõriklavvast ossavõtnuid tervüt põliskiili aastagakümne koordiniirjä Irmgarda Kasinskaite-Budderberg UNESCO pääkortinast Pariisist, üleilmalidsõ põliskiili tüürühmä iistvitäi Richard Grounds (Oklahoma, USA), soomõ-ugri rahvidõ konsultatiivkogo KKFUN edemiis Dimitri Harakka-Zaitsev, ÜRO põlisrahvidõ püsüfoorumi UNPFII liigõ Sven-Erik Soosaar, Fenno-Ugria Asotusõ tekevjuht Viia-Kadi Raudalainen ja Seto Kongressi Vanõmbidõ Kogo päävanõmb Vello Saar.

Ettekandõ üleilmalidsõ põliskiili aastaga 2019 opitunnõst Eesti jaos pidi Oliver Loode (URALICu Keskus), ülekaehusõ põlitsidõ kiili aastagakümne plaanmisõst UNESCOn ni ildaaigo valmis saanust seto keele arõnguplaanist tekse Rein Järvelill (Seto Infoselts). Päält tuu kitedi tsõõriklavval hääs Verska kuulutamisõ tsihi ni naidõ täütmises tarvilidsõ tegemise.

Üleilmalinõ põliskiili aastagakümme 2022–2032
2019. aastaga joulukuun kuulut ÜRO Pääassamblii vällä üleilmalidsõ põliskiili aastagakümne 2022–2032 (International Decade of Indigenous Languages), et juhti tähelepanno pallodõ põlitsidõ kiili väega kehväle saisolõ üle ilma ni takast tougada tegemiisi naidõ kiili alalhoitmisõs, vahtsõlõ elolõ virgutamisõs ja edendämises. Põliskiili aastagakümme om pikendüses üleilmalidsõlõ põliskiili aastagalõ 2019, mink juhtkogon oll osalinõ ka Eesti. UNESCOn vasta võet põliskiili aastagakümne üleilmalinõ tegemiisiplaan kuts üles liikmitriike kokko pandma uma riigi tegemiisiplaanõ põliskiili aastagakümne tsihte elloviimises üten põlisrahvidõ asotuisi ja ütisüisiga ni mitmõsugutsidõ riigi- ja tiidüsasotuisiga. Põlitsidõ kiili aastagakümne ammõtlinõ võrgoleht.

Eesti põlitsidõ kiili kuuntüükogost
Eesti põlitsidõ kiili kuuntüükogo om mitteammõtlik kuuntüüvõrgostik, mink liikmis omma Eesti põliskiili kogokundõ iist saisja ni naid tugõja asotusõ. Kuuntüükogo alost 2020. aastaga vahtsõaastakuun tsihiga pakku Eesti põlitsidõ kiili kogokunnõlõ huvikaidsõt nii Eestin kui rahvidõvaihõlidsõlt, seletä Eesti põliskiili saiso laembalõ avalikkusõlõ ni vaihtaq hüvvi praktikit põliskiili edendäjidega üle ilma. Eesti põlitsidõ kiili kuuntüükogo ja tuu liikmõ võtva tegüsähe ossa üleilmalidsõ põliskiili aastagakümne 2022–2032 läbiviimisest. Uma iistkõnõlõja Järvelilli Reinu läbi om Eesti põlitsidõ kiili kuuntüükogo edüstet UNESCO koordineeritävän põliskiili aastagakümne juhtkogon.
Foto 13.04.22 Verska tsõõriklavvalt (autor: Indrek Sarapuu)

Teedüs:
Rein Järvelill (rein@seto.ee, +372 504 6423)
Oliver Loode (oliver.loode@uralic.org, +372 513 2992)

SAMAL TEEMAL

Värska deklaratsioon kutsub riiki tunnistama põliskeelte olemasolu Eestis. - Lõunaleht

Värska deklaratsioon kutsub riiki tunnistama põliskeelte olemasolu Eestis. - Postimees Setomaa