Hõrna Aare

Olõ peri Mopkornulgast Antkruva küläst. Esä Hõrna Mihkli oll Antkruvast, imä Rahusoovi Anne Tiirhannast. Ma sündünü 8. augustil 1959, ristet olõ Obinitsa kerikoh.

Koolih käve Obinitsah, keskkoolih Meremäel. Tiirhanna vanaesä ja vanaimä juttõ ja Meremäe koolih opanu’ ja katõld kütnü’ Adamsi Jüri juhatusõ perrä naksi huvvi tundma vana ao ja Setomaa vasta. Päält keskkuuli saiõ sisse aoluku opma Tarto Ülikuuli kaugoppõhe.

Tüühü lätsi Obinitsa sovhoosi mõtsavahist. Ülikuul jäie lõpõtamalda’, a lõpõtõt saiõ Luua mõtsakuul 1985. Sillaotsa Liidi kutsmisõl saiõ naatus üte ja tõõsõ seto ettevõtmisõ kõrraldamisõ man toimõtamma: leelopäiv 1986, kodoluu ja linapäiv Obinitsah, sis seto seltsi asutaminõ, Seto Kongressi ja Seto Kuningriigi alostaminõ.

Setomaa ülembsootskas sääd uma rahvariaga’ 2000. aastagal minno Hao Paul Verskah ja 2007. valõ minno rahvas Meremäe mäe otsah ülembsootksast. Kolmandat kõrda saistsi paku pääle 2018. aastagal Lüübnitsa küläh ja rahvas andsõ kiiora mu kätte. Ma lubasi, õt kolmas ja viimäne kõrd. Olle illos ülemsootska aastak üteh hüvvi inemisiga’ , viimäne kõrdapiteh Petseremaa aastak ka’. Säält jääs süämehe tuu, ku ma käve mastõra Maar´akerkoh Kornilalõ kõnõlõmah ja kullõmah nõvvu. Ni ku pää kirstukaasõ päält nõsti, õkva sis naksi’ mastõrakellä’ lüümä. Illos olle mi sõpru man Udmurdimaal k´auminõ. Jummal tiid kas sööh eloh viil Petserehe, Udmurdimaalõ vai Sibirä setodõ mano päse.

A vaest Peko sääd õks säänestmudu, õt sõbrasilla’, mia’ om meil säet hummogupoolõ setodõ ja sõpru mano, püsüse’ käeh ka’ kõik nöö’ rassõ’ ao’.