Leima Aarne

Sündünü’ olõ 1. jaanuaril 1962. aastakal Missoh. Esätalo, koh parhilla elä ja toimõta, om Luhamaa nulgah Leimani külah. Keskkuuli käve Tartoh, säält edesi lätsi Tal′na merekuuli. Sõs olligi kümme aastakka meremiis ja no’ omma’ kõik maailma nulga’ läbi kolgatõt. Tõistõ rahvide ja kultuurõ nägemine om avitanu’ umma löüdä’, mõista’ ja hoita’.

Nelli aastakka tagasi pakutu’ võimalus Setomaalõ tagasi tulla’ – olõ Setomaa Valdu Liidu man ettevõtlusvedosnik – om muutnu’ mu elo tävveste. Luhamaa küläselts, filmi “Peko päiv” tegemine, Seto kongressi vanõmbidõ kogo, kroonikogo, giiditüü ja pall’o muud.

Peko tahtminõ, õt must saasi’ ülembsootśka, sündü 2012. aastaka kuningriigi pääväl Värskah ja viil kõrd aasta ildampa Luhamaal. Tiiämi, õt inämbüs setosid eläs välähpuul Setomaad, ja kipõlt sai mullõ selgest, õt tiidmist, mis kotoh sünnüs, oodõtas väega. Sootśka tähendäs ka ‘sõna tuuja’. Ütes mu päämädses tsihis oll′ olla’ kimmäs lüli Setomaa ja muial olõvatõ setodõ vaihõl.

Tiidmine, õt kiä olt, kost tulõt, avitas tii pääl püssü’. Hüä, ku tuu tiidmine om minejäl kotost üteh võtta’.

(20 aastakka Seto kuningriike. Seto Instituut, 2016)