Torm-Kriisi Piret

Olõ taahha ilmä tulnu Tarto liinah rahvusvaihõlisõl tiäätrepääväl. Arvada and säändsel pääväl sündüminõ mullõ mõistmisõ jutussit kõnõlda – latsiaiah panni oppaja minno õga päiv tõisilõ jutussit kõnõlama. Ja ma siss kõnõli, näid jutussit, mitä olli kuulnu uma setost esä ja esäimä käest.

Latsõpõlvõ suvõ` olli maatütrik vanaimmi man Setomaal Pööni küläh ja Järvamaal Kaaruka küläh. Saie kipõstõ arvu, õt edimia om noidõ kotussi` man väega tõistsagamanõ – innekõkkõ muidohki kiil, a ka inemisõ`, kombõ`, huunõ`, süük, rõiva`. Kõnõlamah mäletä hinnäst inne seto vanavanõbidõ perrä seto keeleh ja hildapa imä perrä eesti keeleh, koh mõnõ` sõna` ülti Järva muudu.

Talvõaol olli liinatütrik ja opse kogo kooliao Härmä Miina Gümnaasiumih. Sjoost koolist sai arvusaamisõ, õt eissagamadsi` kiili` mõistminõ om eloh väega tähtsä. Õt olli perre ainumas lats, panti minno opma balletti, ilovõimlõmist, ilouisutamist, klaverimängmist, tennisõmängo, kuntsi. Olõ vanõbilõ ulli tenolik, õt nä paljo aigu uma latsõ jaost pühendi ja piä sjood latsi kasvatamisõ man väega tähtsäst.

Korgõhe kuuli lätsi opma eläjätohtrest EPAhe, a aastaka peräst sai arvu, õt tiäätrepääväl sündünü saa-ai ellä püüneldä. Nii lätsi Talina Ülikuuli opma tandsjast ja tandsooppajast. Arvada om uma jago tuu otsusõ man ka seto vanaimäl, kia kogo latsõpõlvõ opas mullõ seto muudu tandsmist ja väsü-üs kõrdamast: „Kõkkõ võit sa eloh tetä, a tandsma sa piät“.Magistrikraadi sai Tarto Ülikuulist kultuurikõrraldajana.

Seto leelot olõ opmah käunu leeloparkõh KULDATSÄUK ja LEIKO ni Lummo Kati laululaagrih. Eis olõ vedosnik kultuuriklubilõ SETOLUU`. Tandsmisõ man olõ olnu kogo uma elo pääle ülikuuli lõpõhtamist. Mullõ miilüs tetä tuud, mitä mõista. Ja tandsminõ ni tandsooppaminõ om sjoo, mitä ma mõista. Mul hindäl om latsist Kaera-Jaani nel`k, tähendäs 2 tütärt ja 2 poiga. Latsõlatsi om parhilla samahtõ 4. Näidõ kõigiga kõnõla seto keeleh, oppa laula` ja tandsa`.

2017.a. oll Peko soovist, õt Setomaal nõsõsi tandsminõ avvu sisse. Minno ülembsooskast sortõh sai tandsõh peet Eesti Vabariik 100. Edimäst voori tulli seto` üle ilma kokko, õt pitä I Seto Tandsopido KAGOSS KARGASÕ`.
KAGOSS KARGASÕ` oll pido, määnest olõ-õi olnu viil.
Kargus tuu köüt seto` ütte õkva nigu seto kiil.
(Tungla Leelo salmikõnõ Pireti seto kiilde pantuna)