Järvelilli Rein – Seto kroonist, Kuningriigist ja punkbändist (0)

Mis asi om Seto kroon?

Peko käsul ja Setomaa Kroonikogo kõrraldamisõl om Seto kroon Seto Kuningriigi uma raha. Eesti riigi säädüste perrä om tegemist kunstiteosõga, mis om autoriõigusõ kaitsõ all. Seto krooni välläandmisõst nimet´ Kroonikogo minno Seto Panga presidendist ja pand´ ülesandõst laskõ’ krooni’ käibele, tagada’ krooni ringlus, turvalisus ja usaldusväärsüs. Seto Panga tegevüst kontroll Setomaa Kroonikogo, kes om ka panga nõukogost. Seto Panga valuutareserv (euro’) and kindlusõ, õt ku Seto krooni’ Seto Panka jal tagasi tuvvas, sis saava’ inemisõ’ uma’ euro’ tagasi. Kasum mis tekküs seto kroonõ lainamisõst, lätt Kroonikogo tegemistõ toetamisõst ja krooni käügüh hoitmisõst.

Seto kroon om olõmah, a mis tä õks om, kas õnnõ suvõniir?

Seto kroon om kunstiteos, nigu ma jo inne ütli. A õgal as´al, ka kunstiteosõl om uma hind vai väärtüs. Kõik ettevõtja’ õi pia’ kõiki tehingit tegemä õnnõ raha iist, või tetä’ ka kaup kauba vasta vai siis niinimetet bartertehingit. Ja tuust bartertehingust sobis Seto kroon peris höste.

Kas Seto kroon om ka turvalinõ?

Kimmähe teküs küsümüs, õt kas saa koopiamassinaga kroonist koopiat tetä’. Seto krooni kaits autoriõigusõ säädüs. Keelet om piraatkoopiatõ tegeminõ ja koopiamassinaga tettü om võltsing ja ku kiäki pruum säntse piraatkoopiaga tullu tiini’, või olla’ mõnõl juhul tegemist säntse kuriteoga, minka iist võidas eiski vangi panda’. A õga koopiamassinaga õigõt seto krooni perrä tetä’ ka õks õi saa’. Seto krooni paprõ seeh omma’ vesimärgi’, erilinõ papõr, ultraviolettkiirgusõh helendüvä’ kirä’ ja õgal ütel uma seerianumbri. Lisas viil paar nippi, kuis piraatkoopiat om lihtnõ selgest tetä’.

Kuis ettevõtja võisi’ kasuta’ Seto krooni?

Loomuligult om tollõ kasutaminõ vaba tegevüs. Pank õi kontrolli’ Seto krooni kasutamist ja õgaüts või timäga tetä’, mis taht. Seto pangal om muid´ogi noidõ ettevõtjidõga, kes kasutasõ’ umah majandustegevusõh tehingutõ tegemisõl Seto krooni, kokkolepe’, õt näide käest vahendusmassu õi võeta’ ja nä saava’ Seto krooni Seto Panka tagasi tuvvõh tuusama raha tagasi, mis näide iist inne masti.

Mille piasi’ ettevõtja Seto krooniga kauplõma?

Seto krooni kasutaminõ om võimalus silmä paistu’. Tõistmuudu kauplõminõ and õks mäntsegi eelisõ tõistõ tavalistõ iih. Ja mille kauplõja õi piasi’ vasta võtma kaupa, mis õks midägi om väärt. Paremp Seto kroon vasta võtta ku kaup katski jättä’.

Kuis Meremäe vallal lätt?

Kuna Meremäe vald om osa Setomaast, sis om Meremäe valla edeneminõ seotu terve Setomaa elo edenemisõga. Om hüä, õt eestimaalastõ siäh om kasunu huvi ka Meremäe valla tegemistõ ja elo vasta. Õks viimätsel aol om pall´o tettü ka tuu jaost, õt inemistõl ja külälistõl olõs Meremäe vallah hüä olla’. Valla suurõmpa’ külä’ omma’ saanu puhta joogivii ja kõrraligu kanalisatsioonisüsteemi, valla teie olukõrd om paranõnu, külälistõlõ om avatu vahtsõnõ vaatõtorn Meremäe mäe otsa. Nuu’ omma’ õnnõ mõnõ’ näüte’ muutustõst parempusõ poolõ.
2015. aasta om Meremäe vallah olnu erilinõ muid´ogi uma kultuurielo poolõst. Obinitsa külä om timahava terve soomõ-ugri maailma kultuuripääliin. Kultuuripääliin om Meremäe valda toonu s´oo aasta erilitsõlt pall´o nii hõimurahvit ku muid külälisi. Obinitsa, Meremäe vald ja terve Setomaa om tuu peräst olnu erilitsõ tähelepanu all kõigi ummi kultuurisündmustõ ja uma kultuurieloga.

Kuis Kuningriik läts?

Hüä miil om, õt kultuuripääliina pääsündmus läts kõrda. Kitä kõiki kuningriigi kõrraldajit. Hulka kitmisõ sõnnu om kuulda’ olnu ja ka rahvast oll´ kuningriigih rohkõmp ku kunagi varõmp.

Olõt ka Seto Miihi Summa laulja – sõnolinõ ja killõ ni SMS Tuhkwizza laulja-trummimiis.

Toda tulõ-i õga päiv miildegi, õt laula sääl. Laul õks kuulus seto elo mano. Punkbänd om seto kultuuri vahtsõsluumisõ ja alalõhoitmisõ kotus. Laulu’ omma’ meil inämbüs hindäl luud vai rahvalaulõst ümbre säet. Olõ tuud leelokoorih laulmist ja bändi tegemist tennü õks rohkõmp lusti peräst, a viimätsel aol om tulnu jo veiga pall´o esinemisi ja tundus, õt tuu lätt ka tõistõlõ kõrda, midä mi tii. Tuu vaest omgi sis kultuuri järepidevüs, ku peetäs meeleh ja mõistõtas vanaaolist ja luvvas midägi vahtsõt.

Väke Seto kroonilõ ja edenemist seto elolõ!
Kauksi Ülle