Leelokoor Leiko pandsõ uma pargi poolka pääle! (0)

Nakam illo lõpõtama,
Leiko koori kokko köütmä.
Kõik mi laulõt laulukõsõ,
leelosõna’ ladusa’,
veerätetü viiekese,
naarukõsõ, nal´akõsõ,
ar´a tandsit tandsokõsõ,
kavva karat kargusõ.
Köüdäm rõõmu’ rätte sisse,
sääme siidilinte sisse,
saadamõ ar´ muuseumi,
kõigil kaia’, perrä tetä’.

51. aastakka tegutsõnu leelokoor Leiko kutsõ 4. oktoobril Verska Kultuurikeskusõhe kokko lähebä’ leelopargi’ ja tandsorühmä’, õt ütidsel iloõdagul kokko köütä’ Leiko koorikõnõ.
Korgõhe ikkä joudnu Leiko leelonaase’ Hirsiku Veera, Kapteni Maime, Enno Maria, Kriiskamäe Maria ja Linnu Lidia lõpõtiva’ pargih leelotamisõ ja kuuh kul´atamisõ.
Leiko naase’ korjusiva’ pia õga kolmapäävä kultuurikeskusõhe kokko, õt laulta’, esinemisplaanõ arota’, jutussit aia’, sünnüpäivi ja tähtpäivi pitä’. Olõnõmalda korgõst iäst, oll´ naisil kuuhkäumisõ himo ja tahtminõ ummi laulusõnno ja tiidmisi ka edesi anda’.
Leiko alost´ umma kuuhkäumist Verska Kultuurimaja man 1964. aastakal. Koori kutsõ kokko Kalevi Juta, kiä oll´ tuulaiga kultuurimaja juhataja Verskah.
1976. aastakast tämbätseni oll´ koori juhist tuulaiganõ Verska kooli oppõalajuhataja ja matemaatika oppaja Hirsiku Veera.
Leikoh omma’ laulnu lühembät vai pikembät aigu Ledjanova Aino, Ojaperve Aino, Kilgi Ülle, Kapteni Eve, Linnu Liina, Kuremäe Anni, Kõivo Anne, Kirikmäe Ruti, Valgu Meel, Takeli Rines ja Tormi Piret.
Leiko koorist om aastidõ joosul igävikku lahkunu 20 koori liigõht: Kullimaa Anna, Kõiv Nikolai, Sui Jevgenia, Rõžikova Maria, Kõiv Aleksandra, Sai Jekaterina, Puhm Anastasia, Raudla Maria, Pääsik Konstantin, Aelas Jevdokia, Mäeste Anna, Kalev Juta, Kiisik Jevdokia, Luigelaht Marta, Lummo Jekaterina, Mehine Anna, Palumaa Alli, Hade Aleksandra, Sitik Maria, Pihla Akulina.
Olõnõmalda tuust, õt Leiko koor inämp kokko käu-i, jäävä’ naase’ õks laululidsõst ja ilolidsõst. Loodami, õt vaehtõpääl pandva’ nää’ sõna’ jäl sõlõ ala, võtva’ lauluviie’ poolka päält ja tulõva’ seto pidodõ ja kirmastõ aigu kokko kul´atama.

Vabarna Jane
Setomaa ülembsootska