Seto Kuningriik 1997

IV Kuningriigi päiv 2. augustil 1997 Luhamaal

Ülembsootska ja meistri´

Seto Instituudi 2016. aastagal vällä antu "20 aastakka Seto Kuningriike" kõnõlõs niimuudu: 

Neläs kuningriigi päiv Luhamaal nakaś pihta jumalateenistüsega Luhamaa keŕkoh. Pääle tuud minti koolimaja taadõ platsilõ. Keskpääväl tõmmati masti lipp, laulti hümn ni Peko käskõ vällähõikamisõga oll′ alanu’ ka päiv ni edesinõ müll. Rahva hulgah tekk′ kõkõ inämb elevüst kõrraldus, õt kaklõja’ pandas kartsa ja joodigu’ viiäse’ lällämise paika.

Päävä sisu oll′ sarnanõ varahambitsilõ aastakilõ. Viidi läbi sõnolisõ, pillimehe ja vägimehe valimisõ’, tetti selges kõkõ paremba leevä ja sõira küdsäjä, handśa-, veini- ja ollõmeistri.

Katõkümne aastaga seeh om tervelt kuvvõl kõrral sõnolisõs valit Hainsoo Minna leelokoorist Helmine. Edimäst kõrda tä tull′gi võitjas edimätsel Luhamaa kuningriigi pääväl.

Hao Paul tulõt′ miilde, õt sõnolisõ võistlusõl jäi ütetõistkümnest laulunaasest pääle arotõlõmist sõgla pääle nelli, kelle peräst tetti jo salahhunõ hääletüs, minkõ tulõmust tiiämi. Rõõmu võidsõ tunda’ tuu üle, õt ku varahampa olli’ osavõtjis õnnõ vanõmba’ naase’, sis no julksi’ mitmõ’ noorõmba’ki osa võtma tulla’. Kõkõ noorõmbas osavõtjas oll′ Variksaarõ Ilme.

Kõik osalisõ’ leelodi’ tuust, kuis kuningriik Luhamaalõ jõudsõ ja kuis nää’ esi sinnä sai’.

Kõkõ vanõmb väläh olnu’ pillimiis oll′ Pääsigu Kusta, a võit′ hoopis Tero Kalju Mikitamäelt. Nigu om mitmõkõrdnõ kuninga sõnolinõ Hainsoo Minna, nii om ka Tero Kalju veteranpillimiis – tä om tiitli võitnu’ kokko kuvvõl kõrral. Ka timä võidu’ naksi’ pääle 1997. aastagal Luhamaal.

Tegemist oll′ alostustõrikka pääväga. Ka säitsmel kõrral kuninga leeväküdsäjäs valit Taali Hiie vei uma edimätse võidu kodo nimelt Luhamaalt. Tegemist om rekordiga, katõkümnendäs kuningriigi pääväs olõ-s kiäki samal alal nii mitu vuuri võitu maitsnu.

Miihi rüüpe tegemisõ alal, ollõmeistri valimisõl om kõõ katõkümne aastaga seeh vaja olnu’ naisiga arvõsta’. Pia poolil kõrrul omma’ tiitli võitnu’ hoopis naase’. Luhamaal lätś ollõmeistri tiitli kogonistõ tervele naisi kambalõ – kõkõ parembas tunnistõdi Helmekaala leelokuur Võrost.

Tuul aastagal oll′ Eesti krooni kõrval käübel ka uma papõŕraha vääringuh 20, 50, 100, 500 ni 1000 hõpõt. Riiki sisse tullõh oll′ võimalik uma’ krooni’ hõpõ nimelitsis paprõpallus vaelda’ ja näidega kauba iist massa’. Peräst sai ülejäägi kroonõs tagasi vaelda’ vai hindäle mälehtüses jättä’.

Edimätsele Luhamaal peet kuningriigi pääväle oll′ tulnu’ ka hulk riigijuhtõ. Eesti valitsusõ nimel avald′ kuningriigile lugupidämist pääministri Siimanni Mart, kiä arvaś, õt kuigi seto kuningriik om kõgõst päävä pikkunõ, om timä üts Eesti rahvuslikkõ rikkuisi umaperälitsõ keele, laulu, tandsu ni kultuuri tõttu.

Parembat handśa-ajajat avit′ vällä sorti’ regionaalministri Aru Peep, veinimeistrit pääministri Siimanni Mart, a kodo-ollõ tegijat rahandusministri Opmanni Mart.

Uma kraamiga olli’ pidol väläh mitmõ’ kodoollõ tegija’. A lisas kotoh tett humalaviile sai pidol pruuki’ ka Tarto Ollõtehasõ tumõdat olt “Seto kuningriigi ollõkõnõ”.

Tavaperätselt toimu vahtsõ ülembsootśka valiminõ. Kiä hääletä’ tahtsõ, tuu lunast′ kuvvõ krooni iist hääletüssedeli ja kirot′ sinnä uma kandidaadi nime. Peko asõmõl kolm aastakka valitsõnu’ Hao Pauli aig sai ümbre ja neländä valitsõmisaastaga ülembsootśkas valõ rahvas Luhamaa mehe Kera Volli.

Pääle tuud katõti jo kooli kõrvalõ kõiva ala kuninga laud ja päiv viirdü õdaguhe laulu ni pillimänguga.