Seto Kuningriik 2006

XIII Kuningriigi päiv 5. augustil 2006 Mikitamäel

Ülembsootska ja meistri´

Seto Instituudi 2016. aastagal vällä antu "20 aastakka Seto Kuningriike" kõnõlõs niimuudu:

Mikitamäel oll′ jalki päiv inne kuningriiki ka latsi päiv, koh päämäist huult kandas noorist. Tuu oll′ peräh mõnõaastagast vaheaigu kolmas kõrd.

Ku päiv oll′ Karisilla küläplatsil alostõt, liiguti edesi Lüübnitsa, koh kõik päältlõunanõ aig noorilõ opati eloh vajaminevit töid ja käsitüütarkuisi. Näütüses sai pruumi’ vüü, pääpaila ja raamadu järjehoitja tegemist, kõttu täütvä askõldusõ poolõ päält jal sibulavanigu palmitsõmist, kala puhastamist ni küdsämist.

Õdagu, ku tagasi Karisilla küläplatsilõ tulõ ümbre kogonõdi, opati ja tandsiti kargust ja kasatskit. Õga kuul näüdäś ka umatett kavva teemal “Sinno armasta, mu kallis Setomaa”. Tublimba’ sai’ võimalusõ tuud näüdädä’ ka kuningriigi põhipääväl õkva peräst alostust, ku kõigil miil viil värske om.

Valiti ka kõõ paremb sibulapalmigu palmitsõja, kargusõkargaja tütrika hulgast ja kasatskikargaja poissa pargist. Pääle tuu löüti, õt ülembsootśkal piasi’ olõma ka abimiis, kiä tegelesi’ nimelt nuuriga. Kõkõ parembahe kõlbas tuu jaos ineminõ, kes om ka esi nuur. Valiti kõgõ edimäne nuuŕsootśka, kelles sai Vabarna Jalmar, mitmõkõrdnõ kuninga kaŕus ja kargusõvõistlusõ võitja.

Üle Setomaa kokko tulnu’ noorilõ paki’ seltsi ja küläkostis kaemisrõõmu külälisõ’ Vadjamaalt ja Kaasani liinast Tatarimaalt.

Kuningriigi päivä peeti tõist kõrda Mikitamäe põhikooli staadionil. Riitsaarõ Evari jaos oll′ śoo kolmas kõrd, ku tä ülembsootśkana sai kuningriigi päävä vallalõ tetä’ ni kaariku ja lipuga platsi pääle sõita’. Laulti hümn ja nõstõti üles lipp. Vanulõ olõjilõ miildetulõtusõs ja noorilõ oppusõs loeti ette Peko käsu’, miä tulõti’ miilde Seto kuningriigi piire, a ka tuud, õt kotusõst olõnõvalt tulõ siski täütä’ kas Eesti Vabariigi vai Vinnemaa säädüisi.

Sis anti sõna nuilõ, kellel midägi süäme pääl oll′, ja ka latsi päävä tublimbilõ.

Meistrimiihi võistlustõ kavah olõ-s suuri muudatuisi johtunu’. Śoo kõrd olõ-s hobõsõmehe võistlust ja ka Luhamaal tiitli võitnu’ kandlõmängu meistri jää-s tiitlist ilma. Ildampa om kuninga kandlõlüüjat vällä sordit õga aastaga.

Võistluisi kõrvalõ sai kaia’ ka laatu ja niisama moro pääl pikutõlla’ ja hüvvämiit tunda’ ilosast ilmast. Vihma tulõ-s ja päiv ka kütä-s liisna pall′o. Huvilitsõ’ sai’ sõita’ hobõsõvankriga vai uuri’ Haanjamiihi, kiä piä õgal aastagal kuningriigi päivil väläh omma’, pinokota ehk püstkota.

Lavahuunõ tagakülele olli’ vällä pantu’ kavandi’ kõõ paremba seto hõpõraha löüdmises. Setomaa Valdu Liidu ja Seto kuningriigi kroonikogo puult vällä kuulutõt konkursi tsiht′ oll′ saia’ paslik mündi kujundus, midä saasi’ kasuta’ seto ehtide tegemises. Rahvas sai uma lemmiku puult helü anda’, ni ku nuu’ olli’ žürii arvamisõga kokko pant, selgü võitja – Taro Julia, perästine aolehe “Setomaa” külendäjä. Kuigi kuningriigi pääväl 2010. a Mikitamäel anti meistreile avvuhinnas ka üts hõpõmünt, olõ-i viil teos saanu’ lootus võtta’ kasutusõlõ uma Setomaa raha.

Õdaguspoolõ, ku kõik meistri’ olli’ validu’, tull′ aig kõõ tähtsämbäs hetkes – ülembsootśka valimisõs. Pakkõ pääle astõ’ Sarvõ Õiõ ja kolmõl aastagal taad amõtit pidänü Riitsaarõ Evar. Kuigi Evar lõpõt′ jo umma kolmandat amõtiaastat, oll′ tedä ülembsootśkas valit kõgõst katõl kõrral. Mineväl aastagal tulli’ valimisõ’ kõva vihma tõttu ar jättä’. Sis löütigi, õt amõtihollõv ülembsootśka täüt amõtikohussit seeni, kooni valitas vahtsõnõ.

Śoogi kõrd jõudsõ uma tubli tüü tõttu rahva poolõhoiu võita’ Riitsaarõ Evar, kiä astõ tuuga uma amõtiao algusõh samalõ pulgalõ kuningriigi päivi mõttõ “maahatuuja” Hao Pauliga, kiä om niisama nelli kõrda Peko asõmiku tüüd tennü’.

Riitsaarõ Evar sai sis neländät kõrda parembilõ kuninga meistrimiihile kätte anda’ avvukirä’ (minevä aasta sis Luhamaa asõmõl Obinitsah pääle “Taarka” etendüst) ja kolmandat kõrda vasta võtta’ Setomaad kaitsa’ lubava sõaväe paraadi (Luhamaal jäi vihma peräst paraad ar’). Ka śool kõrral oll′ rivih pall′o miihi ni naisi, nuuri ni vannu, pilliga ni muu sõariistaga varustõt võitlõjit. Nüüdisao armeele tarvilitsõ mobiilsusõ tagatisõs olli’ nii hobõsõ’ ku ka oranžist Zaporoožetsist ehitet raketikandja.

Õdagut jäi lõpõtama kuninga laud meistreile ja kirmas kõigilõ ülejäänü’ pidoliisile.