Seto Kuningriik 2008

XV Kuningriigi päiv 2. augustil 2008 Verskah

Ülemsootska ja meistri´

Seto instituudi 2016. aastagal vällä antu "20 aastakka Seto Kuningriike" kõnõlõs niimuudu:

Kolmandat kõrda tulti Värskah kuningriiki, a päiv inne oll latsi päiv, koh Setomaa noorilõ tutvustõdi ja opati käsitüüd, kultuuri ja kiilt.

Kõgõpäält jaeti noorõ’ ar ja säeti kokko rühmä’. Nä käve’ müüdä tanomit, mõtsu, hainamaid ja ku aigu oll, sis sei’ ka marju ja kai’ ilosit kotussit. Mõnõh piatusõh tull näil tetä’ närdsast noorkit, mõista’ vastada’ küsümüisilõ ja Sarvõ Õiõ abiga’ tõlki’ lastõlaula seto kiilde. Peräkõrra laulõti nuu’ laulu’ ilostõ ar ka ja opati tõisigi’ laula, tandsa ja mänga.

Ku supp ja pehmeh rabarbrikuuk süüdü’ sai, valiti vahtsõnõ nuuŕsootśka. Kandidaadõs olli’ Ämariku Evelin ja Hõrna Maaŕa. A sis võtt′ Maaŕa kõik hindä takah saisva’ noorõ’ üteh ja vei nää’ konkurendi handa. Nii valitigi ligi viiekümne helüga vahtsõs nuuŕsootśkas Värskast peri Evelin. Õdagu oll′ tandsminõ, koh mänge ansambli Klapp. Õga sis viil tiiä-s ütski kolmõst ansambli pillimehest, õt järgmätsel pääväl saava’ näist kõigist kuninga meistri’.

Kuningriigi päiv nakaś pääle ülembsootśka Hõrna Aare ja vahtsõ nuursootśka tulõkiga’ hobõsõvankrih, sis nõstõti üles seto lipp ja loeti ette śooaastagatsõ’ Peko käsu’. Uma tervtüse’ ütli’ kultuuriministri Jänese Laine, euroamõtnik Oviiri Siiri, Eesti Õigõusu pääpiiskop metropoliit Steganus ja mõnõ’ tõõsõki’ viil.

Pall′o küläliisi oll′ nii naabririigist Eestist ku ka Lätist Balvilt, Soomõst Haapajärvilt, Vinnemaalt Irboskast ja Udmurdimaalt. Kihnu naase’ tulli’ kohalõ lausa tsiklidõga. Nätä’ võidsõ pääministrit Ansipi Andrust, kiä pruuvõ umma taido ka näputüüh. Kokko käve kuningriigi pääväl umbõs 6000 inemist – tuhatkond rohkõp ku aastak varahappa.

Suurõmbalõ jaolõ nuist kuvvõst tuhandõst nakaś kuningriigipäiv pääle tollipunkti man. Sääl tull nii hinäle ku uma massinalõ osta’ pilet, õt saia’ edesi minnä’.

Pääle tervitüssõnnu nakaś meistrimiihi välläsortminõ. Sõnolisõ võistlusõl oll′ teemas “Leelo”. Võhtsõno võistlus oll′ kuninga nal′ategija valiminõ. Seniaoni ainsas tuu tiitli umanikus sai leelokoori “Siidisõsarõ’” juht Haavalo Ilme. Nal′ategija kõrval jäi Värskah aoluuraamatuhe ka tõõsõ meistri valiminõ. Kõkõ paremp hõbõsõ vehmridõ vaihõlõ säädjä oll Luivi Mikk. Tiitlit om vällä jagat neläl kuningriigi pääväl.

Kõik meistri’ sai’ hindäle musta-valgõ-verevä põrmandurõiva, kohe oll′ sisse koet aastaarv ja kotus. Oviiri Siiri and hindä puult avvuhinna kõkõ parembalõ kargusõ tandsjalõ ja tuu sai Ahvena Marika. Avvuhinnas oll katõ inemisõ sõit Brüsselihe.

Kes taha-s võistluisi kaia’ vai näist osa võtta’, sis tuu võidsõ kul′ata’ müüdä laadoplatsi, kaia’ näputüüd ja maitsa’ süüke. Lisas kõtutävvele löüdü’ muidogi pottõ, hammit, sepätüüd ni käsitüüd, midä kannaht′ kaia’ ni osta’. Käsitüü opitarõh sai esi’ ka käe külge panda’ ja oppi’ vüü kudamist, ketramist ja piili pääl kudamist.

Päävä tähtsämp osa oll′ muidogi ülembsootśka valiminõ. Lavalõ tuud pakkõ pääle astõ’ kohalik miis Hüdsi Silver ja Tal′na miis Lennuki Lembit. Võitjas tull′ 675 toetajaga Hüdsi Silver.

Vahtsõl ülembsootśkal olõ-s sukugi plaanih kandidiiri’. Tä oll′ jo mitu kõrd ar ütelnü’, a ku 5 minotit inne kandidaatõ esitämisõ tähtao lõppu kuuld′ sõpru käest, õt Värskast olõ-i kedägi kandidiirmah, sis and′ tä sõbrulõ perrä ja arvaś, õt “lää ja saisa sääl ar’!”

“Mu tiidmine oll′ sääne, õt ma läägi sinnä ja ma saisa sääl ar. Midä ma mõista sis lupa’? Ma jõvva-s tuud mõtõldagi. Lubasi, et tii tuu nimel kõik, õt mu latsõ’ võtasi’ ka osa seto kultuurist,” tulõt′ Hüdsi Silver miilde ütte paku pääl vällä hõigat lubahust. Niimuudu om õnnõs ka lännü’. Ni alostusõ “niisama saismisõst” kasvi vällä tubli ja kõrdalännü’ aasta ülembsootśkah.

Õdagu, ku pikk päiv sälä taadõ jäi, oll′ võimalus kaia’ MTÜ Taarka perimustiatri mängit Jäägri Merle näütemängu “Kull′o” ja jalga keeruta’ ansambli Pärnu Poisid muusika perrä. Tuulsamal aol oll′ Seto talomuuseumi rehe all kuninga laud, kohe tulli’ kokko vahtsõ’ meistri’, vahtsõnõ ülembsootśka, varahitsõmba’ sootśka’ ni kutsudu’ külälisõ’.