Seto Kuningriik 2000

VII Kuningriigi päiv 5. augustil 2000 Verskah

Ülemsootska ja meistri´

Seto Instituudi 2016. aastagal vällä antu "20 aastakka Seto Kuningriike" kõnõlõs niimuudu:

Edimätseh ringih Värska hooli-s kuningriigi päävä kõrraldamisõst, a säitsmendä kuningriigi pääväga jõuti edimäst kõrda ka Värskahe. Päiv nakaś hummogu kellä 10 aigu, ku infotelgih sai hinnäst kirja panda’. Nii loodõti kõik kuningriigi alamba’ üles märki’.

“Paar kõrd sai proovit tuud kuninga alambidõ nimestikku kokko säädä’,” tulõt′ miilde sootśka Hao Paul. “Ma olõ-i perästpoolõ näidega midägi ette võtnu. Näe-s nigu põhjust, mille ja kuiviisi sedä asja edesi arõnda’,” selet′ tä projekti saismajäämist.

Värskah alostõdi kavaga kell 11. Kaarikuga sõit′ kuningriigi päävä platsilõ Seto Talomuuseumi moro pääle ülembsootśka Nurmeotsa Sulo ja seto lipp. Kuna lipumasti olõ-s, löüti lipulõ hümni laulmisõ aigu kinä kotus lava kõrval rästä all.

Ülembsootśka tekk′ aroandõ eelmätsest aastagast, lugi ette Peko käsu’ ja tutvust′ pääväkavva. Sis anti sõna tervütüses külälisilõ, a samal aol panti kirja meistrimiihi võistlusõst osavõtjidõ nime’ ja ülembsootśka kandidaadi’.

Paari väiko erändiga olli’ meistrimiihi võistlusõ’ sama’, miä eelmätsel aastagal. Śool aastagal olõ-s veinitegija valimist, a edimäst kõrda valiti piiraguküdsäja. Aoluu edimätses piiragumeistris sai Heili Hillar. Nii veini- ku piiragumeistrit om valit pia õga aastaga kooni täämbätse pääväni vällä, siski Luhamaal 2005. aastagal veinimeistrit vällä sordita-s. Mano tull′ kalamehe võistlus, midä om kõrraldõt viil 2010. aastagal Mikitamäel.

Käsitüümeistri valimisõl tull′ heegeldä’ pitsi. Kuninga vägimehes rühkja’ pidi’ muu hulgah kandma rassõt kotti, miä oll′ pant seto naase rõivihe. Ku näputüüd tegevit võistlõjit sai üte käe sõrmi pääl üles lukõ’, sis näütüses paremba sõirategija välläsort′misõs tull′ inemisil ar pruumi’ ligi kolmkümmend erinevät sõira.

Õt paku pääle saistada’, korssi’ hindäle päävä pääle toetusallkirju nelli miist: Kapteni Endel, senine ülembsootśka Nurmeotsa Sulo, varahamp mitmõkõrdnõ ülembsootśka Hao Paul ja Hõrna Aare. Inne valimisõ algust sai’ kõik kandidaadi’ 3 minotit aigu hindä ja ummi plaanõ tutvustamisõs.

Kõkõ pikembä hanna sai hindä taadõ Hõrna Aare, a kiä tiid, määne tulõmus olõs olnu’, ku tulnu-s ette ütte andśakut johtumist – Hao Paul tiidüt′ ütel hetkel paku pääl saistõh, õt tä toetas esi hoopis Hõrna Aaret, astõ paku päält maaha ja lätś kõiki ummi toetajidõga Aare handa.

“Paali ütel′, õt kiä timä taadõ tulõ, tuu arvõstagu’, õt tä või viguri visada’, tä või midägi tetä’. Tuu lei pahvist, ku Paali maaha karaś ja lauluga sis, õt “ma toeda Hõrna Aaret” liikumma nakaś,” mäleht′ tuud tükkü Aare.

Aarel olõ-s algusõh plaanihki paku otsa minnä’. Ku tä küsse tütre Maaŕa käest, õt mille tuu taha-i kargusõvõistlusõlõ minnä’, kuigi om pall′o haŕotanu, sis lepüti kokko, õt ku Aare astus pakulõ, sis lätt Maaŕa kargamma. Mõlõmba’ pei’ sõnna.

Peräst ülembsootśka valimist ja inne sõaväeparaadi oll′ tunnikõnõ pausi. Kõik huvilisõ’ sai’ püüne pääle astu’. Tuus tull′ päävä seeh uma nimi kirja panda’. A sama ao seeh oll′ ka paraadist osavõtjidõ kogonõminõ ja paraadi kõrra tutvustaminõ.

Kuigi aasta varahampa Mikitamäel oll′ paraadih väläh ka edimäne kabõhistõ kamand Luigasõ Inara iistvidämisõl, kutsuti no’ki sõaväkke õnnõ “miihi õgast Setomaa nulgast, liinasetosid muidogi kah.” Siski lisati sinnä tsipa laemb “üldse omma’ oodõdu’ kõik, kes tahtva’ Setomaa iist saista’”.

Nuid, kiä tahtsõ’ Setomaa iist saista’, oll′ pall′o nii miihi ku naisi hulgah. Rivih saisi’ näütüses nii neläkõrdnõ innine ülembsootśka Hao Paul ku ka vastvalit ülembsootśka Hõrna Aare. Paraadi võtt’ üteh sõasuurõmbaga vasta eelmäne ülembsootśka Nurmeotsa Sulo, a kiiora üleandminõ Hõrna Aarelõ käve viil peräst paraadi.

Peräh paraadi anti kätte tunnistähe’ kuninga meistreile, sis tull′ kuninga laud ja tuuga samal aol kirmas muusikidõ Taivo ja Toivoga.