Seto Kuningriik 2002

IX Kuningriigi päiv 3. augustil 2002 Mikitamäel

Ülembsootska ja meistri´

Seto Instituudi 2016. aastagal vällä antu "20 aastakka Seto kuningriike" kõnõlõs niimuudu:

Hõi hõpõhõimukõnõ,
kuninga ti kummardaja´,
sõsara´ ti targakõsõ´,
vellekese´ võimukandja´,
tulgõ´ kokko kuningriiki
rammumiihhi vällä sortma,
sõirasortõ selgütämä,
pilliviise veerütämä,
umma leelot leelotama!
Lääme sõtta Peko avvust,
küll tä meid kuuld kavvõh havvah…

Sääne oll′ üleskutsõh tulla’ augusti algusõh Mikitamäele kuningriigi pääväle.

Luhamaal ülembsootśkas valit Luigasõ Inara üts lubahuisi oll′ suurõmbat huult kanda’ nuuri iist ja üts vällä pakut lahenduisist oll′ latsi päiv. Edimäne latsilõ rihit kuningriigi päiv peetigi riide, päiv inne kuningriigi põhipäivä Mikitamäel.

Riide kellä katõs oodõti kogonõmisõlõ nuuri setokõisi, kiä esindäsi’ uma nulga kuulõ, a teretulnu’ olli’ ka muih koolõh käüvä’ seto kultuuri huvilitsõ’ noorõ’. Tunn ildampa sõidõti Lüübnitsa küllä, koh kõik osalõja’ viidi loodsikuga Peipsi pääle kalla püüdmä.

Opati õigit nõksõ kala püüdmises, puhastamisõs ni valmistamisõs ja muidogi ka proomiti, mis vällä tull′.

Õdagu peräst perve pääle tagasi tulõkit pidi’ noorõ’ ette näütämä kuningriigi pääväs selges opit kava, minkõ raamõh tull′ kõnõlda’ tuust, kiä midä aastaga seeh koolih seto kultuuri hoitmisõs om tennü’. Tublimbalõ koolilõ oll′ pant vällä tiitli “Setomaa Kuningriigi koolikõnõ”, miä edimätsel aastagal lätś Värska gümnaasiumilõ.

Latsi päiv lõppi laulu ja tandsuga tulõ veereh, süüdi suppi ja maati üü telgih.

Ku kats edimäst kuningriigi päivä Mikitamäel peeti’ vallamaja iih, sis śoo kõrd koliti Mikitamäe kooli staadioni pääle, koh ruumi rohkõmp. Valik oll′ hüä, ka kõik järgmätse’ kuningriigi päävä’ omma’ Mikitamäel peetü’ tuusama platsi pääl.

Keskpääväl tõmmati hümni saatõl üles lipp ja kuulutõdi 9. kuningriigi päiv alostõdus. Loeti ette Peko käsu’. Pääle tuud naati pihta meistride võistluisiga. Varahitsõmba’ päämise’ võistlusõ’ jäi’ kõik alalõ, a lisas tulli’ mõnõ’ vahtsõ’: jo mainit Setomaa kuninga koolikõnõ, hobõsõmiis (nii miis ku naane), nuur kunstnik ja nuur piltnik (fotograaf).

Huvitav om märki’, õt veinimeistris sai jalki Kala Manni, a 1994. aastagast pääle om õnnõ katel aastagal võidutsõnu üts miis, Vananurmõ Ilmar. Kõigil tõisil aastagil om paremba veini kääritänü naane. Ollõga om käünü niisama – inne om õnnõ kõrra ollõmeistris tulnu’ miis, timahaava Mikitamäel tull′ miis võitjas tõist kõrda aoluuh.

Inemiisi oll′ kokko tulnu’ pall′o, a tervet staadioni muidogi täüs saa-s.Külälistõ hulgah olli’ ka Eesti Põrnikaklubi liikmõ’, kiä pei’ uma klubi huuao põhikokkotulõkit nimme Setomaal. Muuseah põristõdi küllä kah kuningriigi pääväle, õt esi osa saia’ lustilitsõst ettevõtmisõst, a pakku’ ka kaejilõ silmäillo – kõik näide mitukümmend erinevä värmikiräga VW Beetle autot pargiti platsi tõistõ otsa huvilistõlõ vahti’. Häste lätś pääle ka kuninganna küük, koh sai pruumi’ ehedät seto süüki.

Ku päiv uma küdsämisõga liiga tegemä nakaś, löüse jahehõmpa vaheldust kõrval olõvast Mikitamäe põhikooli huunõst, koh oll′ vällä pant näütüs opjidõ joonistuisist ja pääväpildest teemal “Meeleperäne Setomaa”. Paremba’ sai’ ka kuninga meistri tiitli.

Ku vällä oll′ sordit viimäne meistri, kõkõ paremb hõbõsõ ettepandja, ni ar kullõldu’ küläliisi tervitüse’, valiti kuningriigi kümnendäs aastagas ülembsootśka, kelles sai tõist kõrda perästikku Luigasõ Inara.

No’ sai ülembsootśka Inara kuninga meistreile kätte anda’ aukirä’ ja kinä mustriga vimpli’ ja vasta võtta’ kuningriigi sõaväeparaadi, miä oll′ harinõnu muudu pite suurõarvulinõ.

Kuninga lavvaga üteaolitsi nakas ka kirmas ansambliga Rahvastepall.