Seto Kuningriik 2007

XIV Kuningriigi päiv 4. augustil 2007 Meremäel

Ülembsootska ja meistri´

Seto Instituudi 2016. aastagal vällä antu "20 aastakka Seto kuningriike" kõnõlõs niimuudu:

Meremäe vallah käu kuningriigi päiv küläkõrda valla keskusõ Meremäe ja kuningriigi sünnükotusõ Obinitsa vaihõl. 14. kuningriigi päiv peeti tõist kõrda Meremäel. Śoo kõrd Meremäe mäe otsah, kost avanõs väega uhkõ pilt lähikonna maastikulõ ja vaatõtorni tipust ollõv hüä ilmaga nätä’ ka Petseri mastõra kuldkuplidõ läügeh. Torni küll jõuda-s śoos kuningriigi pääväs viil valmis tetä’.

“Tull′ märguannõ Pekolt, õt päiv piasi’ tulõma Meremäe mäe pääl,” tulõt′ miilde kõrraldamisõ aigu ülembsootśka amõtit pidänü Riitsaarõ Evar. “Tuulõ olti algusõh kõvastõ vasta, kuna kõikõ olõvat keerulinõ tetä’ – elektri ni muu’ ühendüsliini’. A oll′ tahtminõ näüdädä’, õt śoo mäe pääl om üts kõkõ ilosampi kaehuskotussit. Silmi heidäsi’ nigu üle terve Setomaa.”

Latsi päävä ettevõtmisõ’ naksi pääle päiv varahampa siski Obinitsah lauluimä kujo man. Meisterdedi vilepille, tetti käsitüüd nii rõiva ku ka kõotohoga, joonistõdi, tetti umavahel tutvust ja prooviti sälgä rahvarõivit.

Õdagu joudsõ kõik kamp Navigõ küllä Karo tallo, koh valiti tõõnõ nuuŕsootśka. Kandidaatõ oll′ mitu, pikembä hanna koŕaś hindä taadõ Juhkami Enna. Edimäne nuuŕsootśka Vabarna Jalmar and′ uma kiiora üle ja õtak läts edesi jo Zetode kontserdiga.

Neläkõrdne ülembsootśka Riitsaarõ Evar jõudsõ üteh vahtsõ nuuŕsootśka Juhkami Ennaga Meremäe mäe pääle, hümni aigu tõmmati masti üles lipp ja Evar lugi hiidsuurõ paprõ päält ette Peko pääväkäsu’.

Uma’ tervitüssõna’ ütel′ ka vähämb ku aasta iist presidendis valit Ilvese Toomas Hendrik, kiä tull′ kuningriigi pääväle ülembsootśka Riitsaarõ kutsõl. President Ilves liiku pall′o ringi, tekk′ tutvust laaduga ni inemistõga, võtt′ näid hoolõga hindä kõrvalõ pilte pääle ja muidogi jätä-s ka handśat pruuv´malda.

Kuulutõdi vällä kuninga meistrimiihi võistlusõ’ ja sõnolisõ’ sai’ naada umma pääd murdma tuu üle, mändse’ sõna’ laulda’ teemal: imä oppus latsilõ.

Kuningriigi plats oll′ korgõl kingol, tuuperäst tavalitsõst tuulitsõmp, a nii kõrraldaja’ ku osalisõ’ löüse’, õt esialgnõ pelg lää-s täüde ja platsi pääl ringi liikuh oll′ tuulõvarjo külält. Seto käsitüü kogo moodost platsi keskpaika Petseri huulidsa, koh näüdäti ja opati näpütüüd, puu- ni sepätüüd.

Haanja mehe’ olli’ üteh võtnu ka oda’, tuuga oll′ turvateenistüs tipptasõmõl. A nää’ lei pistü ka uma pinokua, koh üteh setokõisi ja presidendigagi nõvvo peeti.

Istmisõs oll′ pinke asõmõlõ õgalõ poolõ tuud suurõl hulgal põhupallõ ja -pakkõ. Kellel tahtmist oll′, sai hobõsõvankriga müüdä mäekülgi sõita’ vai lähkost kaia’ Peko väe suurtükke, miä truult õgal kuningriigi pääväl väläh omma’. Lisas lava pääl peetüle sõnolisõ- ja tandsuvõistlusõlõ oll′ pall′o laulu ja pillimängu ka rahva hulgah. Platsi pääl sai kaia’ viil ka Riitsaarõ Evari ja Lauritsa Piitre puult kokko pant Matvei Arvi fotonäütüst, midä autoril õnnahtu ka presidendile näüdädä’.

Terve päiv sorditi vällä erinevit kuninga meistrimiihi, a kõkõ tähtsämp oll muidogi vahtsõ ülembsootśka valiminõ. Tuud amõtit olli’ valmi’ pidämä Hõrna Aare, Sarvõ Õiõ ja Jäägri Merle. Toetajidõ hanna’ vingõrdõlli’ pikält-pikält müüdä mäekülge alla. Kõkõ pikembäs kasvi siski Obinitsa mehe Hõrna Aare toetajidõ rivi.

“Ku edimäne amõtiaig kullu rohkõmp kroonikogoga tegeldeh, sis tõõnõ valitsusaasta tõi rohkõp suhtlõmist leelokuurõga, a UNESCO teema ka’ [seto leelo kandminõ UNESCO maailmaperimüse nimekirja – koost.]. Ma lubasi kandidiireh, õt ku mi nimekirja päsemi, sis laula üte laulu kah. 2009. aastagal Vabarna preemia andmisõl tei ma tuu ka ar,” kõnõli Meremäel vahtõst ülembsootśkas valit Hõrna Aare.

Valimisõ aost mälehtedäs siiäni tuud, kuis Merca laul “Hiro” üle platsi kaiku ja egäütele hinge lätś. Päävä lõpõt′ sõaväeparaad, mis koŕaś tavaperätselt kokko suurõ hulga päältkaejit.

Kokko käve kauni kaehtusõga Meremäe mäel kuningriigi pääväl 5000 inemist.