Seto Kuningriik 1999

VI Kuningriigi päiv 7. augustil 1999 Mikitamäel

Ülembsootska ja meistri´

Seto instituudi 2016. aastagal vällä antu "20 aastakka seto kuningriike" kõnõlõs niimuudu:

Kuningriigi päiv jõud′ tõist kõrd Mikitamäele, jalki peeti sedä vallamaja iih. Nigu innidselgi aastagal tull′ kuningriiki päsemisest lunasta’ tii kinni pandnu’ tollipunktist viisa, miä nõudsõ kõrra hoitmist ja and′ vaba ligipäsemise kõigilõ kuningriigi päävä ettevõtmiisile.

Kuningriik nakaś pääle keskpäävä, ku laulti kuningriigi hümn ja nõstõti üles lipp. Ülembsootśka Hao Paul lugi ette Peko pääväkäsu’. Säälsamah tutvustõdi ka ülembsootśka kandidaatõ, kelles olli’ vahtsõst kõrd Hao Paul ja kotusõpäälne Mikitamäe miis Nurmeotsa Sulo.

Ülembsootśka Hao Paul and′ inne kuningriigi päivä avalikuh tiidäandmisõh edesi kuningas Peko arvamisõ: “Kuninga miilt pite oll′ ka tuu, kuis asi lõpus vällä näkk′ Meremäel. Kuninga meelest olõ-i joht tähtsä, kas Mikitamäel om Setomaa ülembsootśka valiminõ täpipäält säänesama vai veid’o muudõt, a papridõga sehkendämise om tä ka timahaava ar kiildnü’.”

Võeti nõus jakada’ eelmätsel aastagal ar proovit valimiskõrda “Kes that Setomaa ülembsootśka valimisõl uma sootśka-kandidaadi võidulõ viiä’, piat Mikitamäel õigõl aol õigõh paigah ja õks terveh tüküh väläh olõma nii kraps ku püksinöps!” Ku päävä tõõsõl poolõl valimisõst lätś, oll′ Mikitamäe mehe puuldajidõ hand pikemb ja vahtsõs ülembsootśkas sai Nurmeotsa Sulo.

Oll′gi kõrd kuninga meistrimiihi välläsort′misõ käeh ni alostõdi võistluisiga. Sõnolisõ võistlusõ teemas oll′ “mõts”. Inämbus kümnest sõnasäädjäst arõnd′ mõtsaäri teemat, näütüses “Häötägu-i esä hirremõtsa, vanaesä varanduista; veegu-i palkõ ti muilõ mailõ, tõistõ riike rikastagu-i”. Võitnu’ sõnolinõ Heliste Leida kai aśalõ tõõsõ kandi päält. Timä tulõt′ miilde umma latsõpõlvõ, kuna mõtsah võidsõ nätä’ mitut imeht.

Sama’ võistlusõ’, miä minevä aastaga, olli’ ka timahaava, a lisas tull′ edimäst kõrda kargusõkargaja valiminõ. “Arotimi, õt midä viil höste tetä’ mõistami, midä rahvalõ näüdädä’. Pillimiis mäng ja mehe’-naase’ tandśva’,” tulõt′ miilde Luigasõ Inara, üts kõrraldajist. Ildampa om naatu eräle vällä sortma kasatski ja kargusõ meistrit, aig-aolt ka miihi, naisi ja nuuri osavõttu võistlusõst. “Mul om taast hüä miil,” ütel′ Inara hindä alostõt ja parhillani püsünu’ traditsiooni kotsilõ.

Peräst võistluisi sai’ sõna ka külälisõ’. Jo mitmõndat kõrda tulli’ kuningriigi pääväle sõbra’ Soomõst, Pekostõ suguseltsist. Ka oll′ kohalõ tulnu’ esindüs Torgu Kuningriigist, mis om Sõrvõ seere tipuh Torgu valla piireh ja kats aastakka vanõmb ku Seto kuningriigi päiv.

Sõaväeparaadist osavõtjit oll′ jo tavaperätselt pall′o. Ka siin tekk′ Mikitamäe aoluku: paraadilõ tull′ vällä edimäne naisi sõasalk Luigasõ Inara iistvidämisõl.

“Sedä panti veega halvas, õt naase’ sõaväkke lätsi’, kuningriigi sõavägi olõvat puhtalt miihi jago ja sinnä naisil asja olõ-i,” tulõt′ Inara muigamiisi miilde. Kuigi tuuga sai ijä murtus ja edespite om paraadih alati pall′o naisi olnu’, olõvat tuukõrd Inara sõnnu perrä “umbõ skandaal tulnu’”.

Seeni omma’ leelokoori’ kuningriigi pääväst hoolõga osa võtnu’. Algusõst pääle kavah olnu’ sõnalisõ võistlus jätt üte võistlõja jaos liiast lühkese ao, õt pikki ja ilosit viise laulda’. Päälegi hinnatas sääl sõnolist, kuur om õnnõ toetav jõud. Tuu peräst otsustõdi pruumi’ ka kõkõ paremba koori valimist. Tuu jaos pallõldi koorõl ette valmista’ kooni kümne minotilinõ laul, minkõ hindaminõ jäi ülembsootśka ja värskide kuninga meistrimiihi kohusõs sis, ku nää’ kuninga lavvah istusõ’. Valimisõl olõ-s tähtsä’ sõna’, a viisi värsküs ja esitüse kõrdaminek.

Võitjalõ lubati tiitlit “Seto kuninglik leelokuur”, midä sai kanda’ järgmätse leelokuurõ võistlusõni. Kuna rohkõmp sändsit võistluisi olõki-i olnu’, sis kand kuningliku leelokoori tiitlit siiäni “Helmine”, kiä oll′ tävveh koosseisuh väläh, laulu ette valmistanu ja kaku-s ruttu kodo poolõ minemä nigu inämbus leelokuurõ kavvõmbast.

Mikitamäe leelokooril olli’ muidogi ka kõva’ ettevalmistusõ’ tettü’ – päävä pääle tutvust′ “Helmine” rahvalõ umanimelist CD-d. Päiv lõppigi kuninga lavvaga, kohe pallõldi kõik kuninga meistrimehe’ ni muidogi ka kutsudu’ külälisõ’.