Seto Kunigriigi võistluisi kõrd
1. Seto leelokuurõ võistlus
Timahava om Seto Kunigriigih koorikõsõ võistlus! Õks tuu jaost, õt kullõlda’, kuis koorih helü’ kokko käävä’ ja mäntsit viise ni sõnno laulõtas.
Laul tohi-i olla’ pikep ku kol’ mintat ja õgaüts otsustas eis’, minkast laul. Laulda’ tulõ pääst, seto muudu ja seto viiega’. Hinnatas kõkkõ tuud, mia seto laulu mano k´au: sõnno, iistütlejät, killõt ja koori hellü. A niisamata ka’ tuud, kuis kuur ilotas ja helü kokko kõlas.
Leelotarko Kogo uut, õt kõik leelokoori’ tulõva’ hüälmeelel ilotamma ja võiki laulma. Võistlõmma oodõtas nii naisi ku miihi!
Võistlusõ päävedosnik: Kalkuni Andreas, andreas@folklore.ee
2. Pillimiihi võistlus
Võistlusõl sorditas vällä üts kuniga pillimiis.
Mängi’ võit:
• libliklõõtsa, karmoškat
• kiigat
• (seto helühannaga’) kannõlt
Kaetas ja kullõldas:
• tulõ mängi’ üts seto kargus ja üts lugu, midä mängitäs Setomaal
• pillimäng õkva kisk tandsma
• pilliperrä om hüä ja kerge seto muudu tandsi’ ja lugu om mängit kimmä taktiga’
• pillimiis piät tiidmä, mäntsest nulgast lugu peri om vai kinka/minka perrä tä om tuu ar’ opnu’
Hindamistargol om õigus jättä’ avvuhind vällä andmalda’, ku olõ-õi s´ood kõrda täüdet.
Päävedosnik: Kadarpiku Tiina, varska.muusikakool@setomaa.ee
3. Naisi näpotüü võistlus
Teema: SETO PUPE
Närdsopupe om rõivast tett inemisõ muudo mängoasi. Närdsonuku või olla’ kas õnnõ rõivast vai täüdet om paklidõ, närdso, vati, saepuru, tuha, kuiva liiva, haina, hüüvlilastaga’ jms. Pupekõisi valmstamisõs saat võtta’ rõivapala’ ja umblõmisõst üle jäänü’ linadsõ’ vai puuvilladsõ’ rõivatükü’.
Seto Kunigriigi näpotüü konkursilõ oodõtas 10–70 cm pikkust seto pupet, või olla’ kas tüdrokõnõ vai poiskõnõ. Üts autor või tuvva’ ka’ mito tüüd. Tüü tohi-i olla’ inne kohki’ olnu’ esitet, avaldõt vai müügi jaos tett.
Konkursil hinnatas, ku kõrdapiteh ja ku keerolitsõlt om tett, kaetas seto traditsioonilisust ja terviklahendust. Hindamisõl arvõstõdas ka’, õt ku vahtsõnõ idee om ja ku huvtavalt om näpotüütraditsioonidõlõ lähenet.
Viimäne aig pupe tuumisõs üteh nimesildiga’ om 1. septembrist 2020 Seto Käsitüü Kogo kontorihe Verskah. Töid võõdas vasta ka’ kunigriigipäävä hummogu infotelgih kooni’ kellä 11ni’.
Töid hindasõ’ kunigriigipäävä aigu hindaja’, kinkõ kuts kokko Seto Käsitüü Kogo.
Näpotüül om 5 liikmeline hindamiskomisjon. Vällä antas 2 auhinda: rahva miildümine ja zürii paremp.
Kõigist konkursilõ esitet töiest pandas kokko näütüs. Rahva hääletüse tulõmusõna kuulutadas vällä ka’ publigu arvatõh kõgõ silmäpaistvapa pupe valmstanu’ näpotüülinõ.
Päävedosnik: Kala Ingrit, 56200057
4. Kargusõkargaja, kasatskilüüjä võistlus
Valitas illos, tark ja kõrralinõ seto esindäjä.
Kõgõ parep kargusõkargaja ja kasatskilüüjä:
• mõist seto muudu tandsi’
• om seto muudu olõkiga’ ja kihähoitmisõga’
• mõist hinnäst pillimehe muusiga perrä säädä’ ja tandsi’
• tands tsõõrih tõisiga ütehkuuh, edvistämäldä’ kaejidõ jaos
Ku om veidebä ku kats võistlõjat, sis hindamist tulõ-õi.
Hindamistargol om õigus jättä’ avvuhind vällä andmalda’, ku olõ-õi tingimuisi täüdet.
https://www.facebook.com/events/623319098177795/
Päävedosnik: sootska Paaba Palaga, 5177614, kargus@swingtants.ee
5. Süüke ja juukõ võistlus
SÕIR:
Sõir ku’ mi paigah käsitsi tettü ja suurõ avvu seeh peetü süük om viimätsel aol nii ülesnõstõt kraam, õt sõiralõ om Eesti riigi puult ja mi hüäskitmisõl tettü taotlus Euroopast tunnusmärgi saamisõs. Tuu tähendäs, õt piämi hoitma umma sõira väiga’ avvu seeh, tegemä sõira säänestmuudu, õt tä väärisi’ mi hindä ja külälisi kitmist.
Sõir:
• piät olõma ilosa näoga’ – hellekõllatsõst kooni’ kõllatsõni’, ku uma’ kanamuna’ seeh omma’
• piät olõma tihtsä olõmisõga’, midä om hüä lõigada’
• piät olõma hüä lõhnaga’
• piät olõma hindäl tettü
• piät olõma tettü nii, õt pernaane saa eis’ tegemisõst kõigilõ kõnõlda’ ja ku vaia, sis tõisi opada’
• sõira seeh või olla’ küümnit, mia om vanaaolitsõ sõira tunnus
LEIB:
Leib om kullanõ pala, minkalõ anti suud, ku käärokõnõ maaha sattõ. Vannamuudu leevätegemisõ man piät kaema, määne tettü leib om.
Leib:
• piät olõma tettü Setomaal kasvatõt kraamist
• piät olõma vannamuudu tettü
• piät olõma hüä maigu ja lõhnaga’
• piät olõma ilosa näoga’
• piät olõma päält ille ja pakso koorõga’
AIAVILÄ PIIRAK
Setomaal om vanast aost tettü mitot muudu piirakit. Om tettü päält vallalitsi, a om ka’ käkidü’ piiraku’, koh sisse pant pala vällä paistu-ui. Innevanastõ panti piirakidõ sisse kapstit, põrknit, kartohkit ja tõisi aiavilju. Tuuperäst piäsi’ mi kõik võtma niti, õt kunigriiki toomõ’ ja teeme’ vannamuudu piirakit õnnõ aiaviläst. Piirak või olla’ rüä- vai nisujauhast vai seätü jauhast.
Piirak:
• piät olõma pakso põh´aga’
• pääl vai seeh piät olõma Setomaal kasvatõt kraam
• piät olõma ilosa näoga’
• piät olõma säänestmuudu tettü, õt pernaane saa seletäda’, kuismuudu tä piiragu tekk
Süüke päävedosnik: Põldmetsa Egle, 56319828
HANS´A, OL’, TAAR ja VERREV VIIN
Setomaal pakutas umatettü’ kraami õks nõnnopite. Tuuperäst piät joogi’, miä’ kunigriigi võistlusõlõ rahvalõ maitsmisõst tuvvas, olõma hüä maiguga’, vannamuudu ja kõrdapiteh tettü’.
HANS´A
Kõrralinõ hans´a piät õks vannaperrä olõma mito kõrda läbi aet ja tohi-i olla’ vähäb ku’ 45 kraati kangõ. Õigõ hans´a om rüäst tettü ja väega’ avvu seeh omma’ nuu’ meistre’, kiä’ viil eis’ ka’ rükä kasvatasõ’. Vannamuudu tettü hans´a om klaar ja ilma värmildä’ ni’ hüä lõhnaga’, minkaperrä saat õkva üldä’, õt kraam om paslik ja õigõ. Hüvvä hans´at piät vällänägemisõ perrä jo tahtma ja maigo perrä hüäst kitmä. Vastavõtja piät kõrraga’ ar’ maitsma hans´a ja ütlemmä tuujalõ, kas juuk lätt Seto Kunigriigi meistri võistusõlõ vai jääs rahvalõ maitsa’.
TAAR
Taar olõ-õi kali. Innevanastõ tetti õgah taloh ummamuudu taari. Taar om leevä vai leevä koorikidõ vai muud muudu jauhhõlõ pääle pantu vii hapnõmisõ perrä saadu hapu juuk. Taar piät olõma ilosa värmi ja hüä lõhnaga’, tegijä piät ar’ seletämmä taari tegemise. Taar piät olõma kõrralitsõlt aigupiteh ar’ hapanu’ ja piät olõma juujalõ meeleline.
VERREV VIIN
Verrev viin om kodoaia vai mõtsamar´ost õigõhe kääritet juuk, miä olõ-õi ätkõst lastu’. Õga meistri tege ummamuudu, tuuperäst tulõ eis’ pruumma tulla’, õt meistri vällä sorti’!
Juukõ päävedosnik: Toomistõ Lauri, 5243876
Söögi- ja joogikraami tingimusõ’ om kirjeldänü’ MTÜ Seto Küük.
Võistlõmma tuud kraami iist mastas rahha:
• sõir 10 €/kg
• piirak 8 €/kg
• leib 4 €/kg
• hans´a 8 €/l
• ol’ 2 €/l
• taar 2 €/l
• verrev viin 5 €/l
Kraami piät olõma:
sõira 2 kg
piirakut 2 kg
leibä (vannamuudu) 2 kg
hans´at 1 liitri (teräviläst vai linnasõst tett ja üle 50 kraadi)
olt 2 liitrit
taari 2 liitrit
verevät viina 2 liitrit
• Kraami või tuvva’ ka’ inäbä ja sis tuu pandas kunigalavva pääle kostis.
• Kraamõ vastavõtminõ kell 10.00–12.00.
• Hindaja’ (söögi- ja joogimaitsja’) andva’ uma helü, a tuu iist tulõ massa’: sõir 4 €, piirak 3 €, leib 2 €, hans´a 6 €, taar 2 €, ol’ 3 € ja verrev viin 4 €.
• Kõkõ inäbä helli saanu’ söögi- ja joogitegijä’ omma’ rahva lemmigu’. S´ooaastagatsõ’ sõira-, leevä-, hans´a-, ollõ- ja taarimeistri’ sortva’ vällä seto söögi ja joogi as´atundja’. Piiragu- ja verevä viina meistri selgüs rahva helüde perrä.
• Juukõ ja süüke pruumminõ lõpõs, ku üte inemisõ tuud kraam saa otsa. Perräjäänü’ joogi’ ja söögi’ läävä’ kunigalauda kostis.
6. Vägümehe välläsortminõ
Setomaa kõgõ kõvõba mehe välläsortmisõ man kaetas joudu, kindlat kätt ja terävät nutti.
Kihäkaal om õnnõ üts ja piä-äi olõma Setomaa juurõ’, om vaia julgõt päälenakkamist.
Kõgõst kõnõldas täpsebält võistlõmisõ man. Kõgõ kõvõba vägümehe jaost olõ-õi tähtsä’ punkti’, tä om tõisist üle, ku om õigõl aol õigõh kotusõh – kunigriigipääväl Kolossovah.
Päävedosnik: Pärsiku Margus, 5118783
7. Seto Kunigriigi pildimehe võistlus 2020
Teema: Setomaa luudus
1. Võistlusõ mõtõh om pruumi’ saia’ pildi pääle Setomaa illos luudus ja nuist vällä sorti’ Seto Kunigriigi kõgõ parep pildimiis.
2. Võistõlda’ võiva’ kõik, v.a välläsortmisõ hindaja’ ja näide perre liikmõ’.
3. Võistõlda’ võiva’ Setomaa luudusõst tett pildi’, mäntse’ olõ-õi inne ütelgi’ võistlusõl võistõlnu’.
4. Võistlusõlõ saadõt pilte man hinnatas, õt kas om õigõh teemah, kaetas väljendüsrikkust, luudusõ illo, kunstilist ja tehnilist tasõt.
5. Õga osalõja või võistlusõlõ esitä’ kooni’ kol’ pilti. Esitä’ või nii tava- ku digitaalkaamõraga’ pildistet mustvalgit vai värmilitsi pilte, mia saadõtas võistlusõ kõrraldajalõ JPG/JPEG kvaliteedilitsõ pildifailina vai originaalfotofaili sisaldava andmõkandjaga’. Fotofaili lühep külg piksliteh piat olõma vähäbält 3508 px.
6. Õga pildi mano tulõ panda’ päälkiri, pildistäjä nimi ja kontaktandmõ’, pildi tegemisõ aig ja kotus.
7. Pilte tüütlemisõl tulõ silmäh pitä’ hüvvä tavva ja nättü tõeperäsüst ja loomulikku esitlüst.
8. Võistlusõst osavõtja vastutas hindä ja pilte kottalõ esitet andmidõ õigusõ iist ja kinnitäs, õt tä om võistlusõlõ esitet pildi tennü’.
9. Konkursilõ saadõt pildest sorditas vällä konkursilõ 15 pilti, nuu’ pandas Seto Kunigriigipääväl 5.09.2020 Kolossova küläh kaemisõst vällä. Võidupildi sortva’ vällä hindaja’ ja rahvas. Kunigriigi pildimiis hõigatas 5. septembril, kunigriigipääväl vällä.
10. Võistlusõlõ esitet tüü’ jäävä’ MTÜ Seto Kunigriigi Kroonikogolõ. Kroonikogol om õigus võistlusõl võistõlnu’ pilte edespidi tasuta kasuta’ ja võimalusõl märgitäs pildi kasutamisõl mano tegijä nimi.
Võistlusõlõ „Kunigriigi pildimiis 2020“ saata’ pildi’ Virro Kerstile kersti.virro@gmail.com vai tuvva’ võistlusõ kõrraldajalõ mälupulgaga’, CD-l vms andmõkandjal. Mano saat küüsüdä’ ja andmõkandja kätte toimõtamisõ kokko leppü’ telefonil 5171451. Viimäne tähtaig om 1. septembri 2020. a.