Süüke ja juukõ võistlus

SÕIR

Sõir om 20. hainakuu pääväst 2021. aastagast Euroopa Komisjoni puult vällä ant geograafilidsõ kaitstusõ tunnusõga, miä tähendäs, õt sõir om tett Setomaa vai Võromaa talokraamist (piim, kohupiim, võid, muna’) ja om sisse pant küümne’.

Sõir piät olõma ilosa värmiga, tihtsä olõmisõga, hüä lõhnaga, hindäl tett. Sõira võtt vasta komisjon, kiä ütles, kas sõir kõlbas sõiravõistlusõlõ.

Sõira tegemisõ kotsilõ saat küsüdä’ nõvvu: Malkovi Pille, 5298 643.

LEIB

Leib om kullanõ pala, minkalõ anti suud, ku käärokõnõ maaha sattõ.
Leib:

• piät olõma vannamuudu tett
• piät olõma hüä maigu ja lõhnaga
• piät olõma ilosa näoga
• piät olõma päält ille ja paksu koorõga

MAR´APIIRAK

Luhamaal om suuh ni mõtsah hulga mustkit, palohkit ni tõisi mõtsamarju, miä’ omma’ jo mustidsõst aost pääle väärt söögikraam olnu’, a avvukohal om õks uma’ kododsõ’ mar´a’. Hüä piirak om õks Setomaal kasvatõt ni kor´at mar´ost. Piiragumeistrist saa tuu, kinka piiragu maitsmisõl rahvas kõõ parembast tunstas.

Kõrraldaja: Käisi Ere, 5804 0675

HANŚA, OL’, TAAR ja VERREV VIIN

Setomaal paktas umatett kraami õks nõnnopite. Tuuperäst piät joogi’, miä’ kuningriigi võistlusõlõ rahvalõ maitsmisõst tuvvas, olõma hüä maiguga, vannamuudu ja kõrdapite tett.

HANŚA
Kõrralinõ hanśa piät õks vana viisi perrä olõma mito kõrda läbi aet ja tohi-i olla’ vähämb ku 45 kraati kangõ. Õigõ hanśa om rüäst tett ja väega avvu seeh omma’ nuu’ meistre’, kiä’ viil eis’ ka rükä kasvatasõ’. Vannamuudu tett hanśa om klaar ja ilma värmildä ni hüä lõhnaga, minkaperrä saat õkva üldä’, õt kraam om paslik ja õigõ. Hüvvä hanśat piät vällänägemisõ perrä jo tahtma ja maigo perrä hüäst kitmä. Vastavõtja piät kõrraga ar’ maitsma hanśa ni ütlemä tuujalõ, kas juuk lätt Seto Kuningriigi meistri võistusõlõ vai jääs rahvalõ maitsa’.

OL’
Üväst tett juuk. Olõ-i mesimakõ. Parasjako käünü. Tohi-i olla’ vesine. Piät olõma hüä juvva’ ja tegemä meele kergest.

TAAR
Taar olõ-i kali. Innevanastõ tetti õgah taloh ummamuudu taari. Taar om leevä vai leeväkoorikidõ vai muud muudu jauhhõlõ pääle pant vii hapnõmisõ perrä saad hapu juuk. Taar piät olõma ilosa värmi ja hüä lõhnaga, tegijä piät ar’ seletämä taari tegemisõ. Taar piät olõma kõrralitsõlt aigupite ar’ hapanu ja piät olõma juujalõ meelelinõ.

VERREV VIIN
Verrev viin om kodoaia vai mõtsamar´akõistõst õigõhõ kääritet juuk, miä olõ-i ätkest last. Õga meistri tege ummamuudu, tuuperäst tulõ eis’ pruumma tulla’, õt meistri vällä sorti’.

Kõrraldaja: Põldmetsa Egle, 5631 9828

Võistlõmma tuud kraami iist mastas rahha:

• sõir 10 €/kg
• piirak 8 €/kg
• leib 4 €/kg
• hanśa 8 €/l
• ol’ 2 €/l
• taar 2 €/l
• verrev viin 5 €/l

Kraami piät olõma:

• sõira 2 kg
• piirakut 2 kg
• leibä (vannamuudu) 2 kg
• hanśat 1 liitri (teräviläst vai linnasõst tett ja üle 50 kraadi)
• olt 2 liitrit
• taari 2 liitrit
• verevät viina 2 liitrit

Kraami või tuvva’ ka’ inämbä ja sis tuu pandas kuningalavva pääle kostist.

Kraamõ vastavõtminõ kellä 10.00–12.00.
Hindaja’ (söögi- ja joogimaitsja’) andva’ uma helü, a tuu iist tulõ massa’: sõir 4 €, piirak 3 €, leib 2 €, hanśa 6 €, taar 2 €, ol’ 3 € ja verrev viin 4 €.

Kõkõ inämbä helli saanu’ söögi- ja joogitegijä’ omma’ rahva lemmiku’. Śooaastagatsõ’ sõira-, leevä-, hanśa-, ollõ- ja taarimeistri’ sortva’ vällä seto söögi ja joogi aśatundja’. Piiragu- ja verevä viina meistri selgus rahva helüde perrä.

Juukõ ja süüke pruumminõ lõpõs, ku üte inemisõ tuud kraam saa otsa. Perräjäänü’ joogi’ ja söögi’ läävä’ kuningalauda kostist.